Nagulat Siya nang Makita ang Dalagang Nilibre ng Kape; Hindi Niya Inasahan ang Kapalit ng Kaniyang Kalokohan

Kahit pa may asawa na sa loob ng halos dalawang dekada si Lonie, madali pa rin siyang madala ng tukso. Hindi niya mapigilan ang sarili kapag nakakakita siya ng magandang dalaga. Makakita lang siya ng isang babae na hapit ang suot, siguradong susundan niya ito ng tingin.

Kapag naman may nakita siyang naghihintay ng sasakyan sa kalsada, kahit hindi niya kilala, basta maganda at sexy, kaniya itong isasakay. Ihahatid niya ito sa bahay, at madalas, hinihiling niyang makaiskor pa rito.

Sa dami ng beses niyang ginawa iyon, hindi na niya mabilang ang mga babaeng nalambing niya. Lahat ng iyon ay lingid sa kaalaman ng kaniyang legal na asawa. Ang asawa niya’y sobrang abala sa pag-aasikaso ng kanilang negosyo kaya hindi na napapansin ang ginagawa ni Lonie.

Kahit ito ang bumubuhay sa kaniya, nagbibigay ng pera at mga luho, hindi niya maiwasan ang mga tukso. Lalo na kapag nararamdaman niyang patanda na nang patanda ang kaniyang asawa at madalang na siyang hilingan ng paglalambing.

Hindi naman niya pinapabayaan ang asawa. Araw-araw niya itong hinahatid sa opisina, pinagbubuksan ng pinto ng sasakyan, at sa tuwing magkasama sila, nagpapakita siya ng sobrang maginoo. Hindi ito nagdududa sa kaniya, dahil sa labas ng kanilang tahanan, mabait at maalaga siya.

Isang Miyerkules, bumangon si Lonie upang maghanda ng agahan para sa kaniyang pamilya. Matapos iyon, hinatid niya sa opisina ang asawa at mga anak. Habang nasa daan, biglang nagpabili ng kape ang asawa sa isang sikat na kapehan na kanilang nadaanan.

“Iced coffee lang ako, mahal. Dalian mo, ha? Ihahatid mo pa ang mga bata,” bilin ng kaniyang asawa habang iniaabot ang isang libong piso.

Nagmamadali siyang pumasok sa kapehan. Pagkapasok, agad niyang ini-order ang kape ng kaniyang asawa at ang sarili niyang gusto. Habang naghihintay, napansin niyang may isang dalaga sa likuran niya. Hindi niya maiwasan ang titigan ito.

Sobrang ganda ng dalaga. Mala-anghel ang mukha nito at ang kinis ng mga braso. Itim ang buhok nito at sa sobrang ganda, tila ba napako ang tingin ni Lonie. Hindi niya napansin ang oras dahil sa pagtitig sa babae.

“Sir, ito na po ang order niyo,” sabi ng barista, na ikinagulat niya.

“Ah, salamat,” sagot niya habang iniabot ang bayad. Pagkatapos, napatingin ulit siya sa dalaga at biglang may naisip. “Ito na rin ang bayad para sa kapeng oorder-in ng dalagang nasa likod ko,” sabi niya sabay kindat sa dalaga.

“Ay, huwag niyo na akong ilibre, sir!” tanggi ng dalaga, halatang nagulat.

“Sinong nagsabing libre iyon? Babalikan kita rito para singilin,” biro niya sabay kagat sa ilalim ng labi. Wala siyang pakialam kahit pa naghihintay sa sasakyan ang kaniyang pamilya.

“Daddy! Ang tagal mo naman daw, sabi ni Mommy!” tawag ng anak niya mula sa labas ng kapehan. Napabalik si Lonie sa realidad at dali-daling lumabas ng tindahan.

Pagbalik niya sa sasakyan, walang bakas ng kalokohang ginawa. Iniabot niya ang kape sa asawa at agad pinatakbo ang sasakyan. Tila ba walang nangyari at siya’y napaka-disente sa harap ng pamilya.

Ngunit bago pa man sila tuluyang makaalis sa parking lot ng kapehan, kumatok sa bintana ng kotse ang dalagang nilibre niya ng kape. Halos hindi makapaniwala si Lonie sa nangyari.

Pipigilan niya sana ang asawa na buksan ang bintana, pero huli na. Naibaba na nito ang salamin. “Anong maitutulong ko sa’yo, hija?” tanong ng asawa ni Lonie sa dalaga.

“Magandang umaga po, ma’am. Isa po akong divorce lawyer. Tingin ko, kailangan niyo ako,” matapang na sabi ng dalaga na ikinalaki ng mga mata ni Lonie.

“Ay naku, wala akong balak na makipaghiwalay sa asawa ko,” sagot ng kaniyang asawa na may ngiti pa sa mga labi. Hindi man ito agad naniwala sa sinabi ng dalaga.

“Kahit nilibre niya po ako ng kape at sinabing babalikan niya ako rito para singilin? Sikat na po ang asawa niyo sa social media dahil sa dami ng babaeng nambiktima siya,” dagdag pa ng dalaga.

Labis na nagulat si Lonie. Napatingin siya sa mga anak niya, na ngayon ay masama na ang tingin sa kaniya. “Ano bang pinagsasasabi mo? Naririnig ka ng mga anak ko!” galit niyang sigaw sa dalaga.

Ngunit imbes na magalit, bumaba ng sasakyan ang kaniyang asawa at kinausap ang dalaga. Hindi alam ni Lonie ang gagawin. Para siyang binuhusan ng malamig na tubig.

Sa pagkakataong iyon, tila wala nang ligtas si Lonie. Tumawag na siya ng lahat ng santo para tulungan siya, ngunit tila walang nakikinig. Matapos ang pag-uusap ng kaniyang asawa at ng dalaga, pinababa siya ng asawa sa sasakyan.

Iniwan siya ng asawa at mga anak sa kapehan kasama ang dalaga. At katulad ng kinatatakutan niya, nakipaghiwalay ang asawa sa kaniya.

Sinubukan pa ni Lonie na ayusin ang kanilang problema, ngunit huli na ang lahat. Hindi na siya mapatawad ng asawa niya. Pati mga anak niya, na dati’y minahal siya, ngayon ay nandidiri na sa kaniya.

Doon nagsimula ang paghihirap ni Lonie. Walang tinira ang asawa niya sa bank account na para sana sa kaniya. “Bakit ba hindi ako makuntento sa asawa ko?” iyak ni Lonie isang araw, matapos tuluyang mapawalang bisa ang kanilang kasal.