Alam ng Abogado na Medyo Tagilid ang Isinampang Kaso ng Babaeng ‘Bayaran’ na Ito sa Limang Lalaki, Subalit Pinili Pa rin Niyang Ipagtanggol Ito; Manalo Kaya Sila?

“Sabihin mo sa akin ang lahat-lahat, Olga. Huwag kang maglihim. Iyan lang ang paraan para maipanalo natin ang kaso mo.”

Ibinuga ni Olga ang usok ng sigarilyo. Pakuya-kuyakoy ang kaniyang kaliwang binti habang nakasampay sa kanan. Nasa coffee shop sila ng kaniyang abogadong si Atty. Mike Ferran. Nasa gilid sila dahil nagsisigarilyo nga si Olga.

Nagsampa ng kaso ng pananamantala si Olga sa limang lalaking umupa sa kaniya para sa isang stag party. Hindi niya akalaing gagalawin siya ng mga ito, lalo na ang groom. Ang usapan ay sasayaw lamang siya at aaliwin sila. Hindi niya akalaing lalasingin pala siya at saka pagsasamantalahan.

“Sinabi ko na sa iyo lahat, attorney. Dancer sa club talaga ang trabaho ko. Matagal ko nang ginagawa ito,” sagot ni Olga habang ngumunguya ng bubble gum.

“P-Pero lumalabas ka ba kasama ng mga customer kapag gusto ka nilang… upahan para sa isang gabi? Alam mo na…”

Natahimik si Olga. Muling nagsindi ng isang sigarilyo. Humitit-buga.

“Minsan. Depende sa offer. Oo, sumasama ako. Kailangan ko ng pera para sa dalawa kong anak, magkakaiba ng ama. Ako lang naman ang tumataguyod sa kanila.”

Tumango-tango si Mike.

“Tatapatin kita, Olga. Hindi madaling ipanalo ang kasong ito, dahil nga sa background mo…”

“Bakit, attorney? Akala ko ba magaling ka?” biglang salag ni Olga. “Kaya nga ikaw ang ibinigay ng PAO dahil sabi sa akin, ikaw daw ang isa sa mga magagaling, pero hindi ikaw ang pinakamagaling, sabagay. Bakit sinasabi mong baka hindi ako manalo sa kasong ‘to, porke ba sa trabaho ko? Na maruming babae ako, ganoon ba? Porke ba maruming babae, hindi na puwedeng magkaroon ng hustisya? Ganito na ba kalala sa bansang ito?”

“Hindi naman sa ganoon, Olga. Pero nakikita ko na ang magiging depensa ng kalaban—iyan nga, na pumapayag kang lumabas kasama ng mga customer na lalaki kapalit ng… ng aliw… ng katawan mo ay may bayad. Gagamitin iyan laban sa iyo lalo na’t wala namang saksi, maliban na lamang kung isa sa limang lalaki ang babaligtad at papanig sa atin. Pero malabo iyon dahil magkakaibigan sila.”

Tumayo si Olga at isinukbit ang kaniyang shoulder bag. Napatayo rin si Mike.

“Oh teka muna, saan ka pupunta?”

“Eh aalis na! Wala namang patutunguhan itong usapan na ito eh, hahanap na lang ako ng ibang mas magaling na abogado!”

Hinawakan ni Mike ang kaliwang bisig ni Olga.

“Relax ka lang… ikaw naman… nagiging makatotohanan lang naman ako rito. Pero gagawin natin ang lahat para maipanalo natin ito. Kaya nga sinasabi ko sa iyo, sabihin mo sa akin ang totoo, lahat ng mga detalye, nang sa gayon ay mabigyan natin ng paliwanag at hustipikasyon,” sabi ni Mike.

“Kahit naman ganito lang ang trabaho ko, kahit na nababayaran ako para sa katawan ko, hindi ibig sabihin niyon na may karapatan na silang babuyin ang katawan ko at pagkababae ko, attorney. Lalo na kung walang pahintulot sa akin. Naiintindihan mo naman siguro ang gusto kong sabihin? Dapat alam mo ‘yan,” wika ni Olga.

“Oo… tama ka naman. Tama ka, Olga,” sang-ayon naman ni Mike sa kaniyang kliyente.

Sa panahon ng kaso ay nakilala ni Mike si Olga bilang isang babaeng gagawin ang lahat para sa kaniyang mga anak.

Ibang-iba si Olga kapag kaharap ang mga anak nito. Hindi ito nagsisigarilyo, hindi nagmumura, at tinuturuan ng magandang asal ang mga anak. Marunong silang magmano at magsambit ng ‘po’ at ‘opo’.

“Ang bait kong mga magulang ‘no, attorney? Gulat ka ‘no? Akala mo siguro pawalwal akong ina kasi pawalwal ang personalidad ko,” minsan ay sabi ni Olga kay Mike. Nagsindi siya ng sigarilyo. Hitit-buga.

“Oo nga eh. Masasabi kong mabuti kang ina, Olga. Huwag kang mag-alala. Ipinapangako ko sa iyo na gagawin ko ang lahat para lamang maipanalo ang kaso mo, para sa iyo, at para sa mga anak mo.”

At nagsimula na ngang gumiling ang paglilitis sa kasong isinampa ni Olga laban sa limang lalaki.

Tama ang sinabi noon ni Mike: naungkat ang uri ng trabaho ni Olga, kaya malaking puntos ito para sa kalaban.

Subalit si Mike ang taong kapag nangako, tinutupad.

Lumabas sa pagsusuri na may halong ibang kemikal ang alak na ipinainom kay Olga, na naging dahilan upang mawalan ito ng sapat na lakas upang makapanlaban, mula sa pagtatangka ng limang lalaki.

Isa pa, hindi rin naibigay kay Olga ang bayad para sa stag party; ibig sabihin, walang bayarang naganap.

Panalo sa kaso si Olga!

“Salamat, attorney Mike! Salamat!” napayakap si Olga kay Mike nang marinig ang salitang ‘guilty’ laban sa limang lalaki.

“Nangako ako, ‘di ba? Ipinangako ko sa iyo na gagawin ko ang lahat para lamang maipanalo ang kaso mo, para sa iyo, at para sa mga anak mo.”

Isang salusalo ang pinagsaluhan nila kasama ang mga anak ni Olga. Para silang isang masayang pamilya!

Makalipas ang tatlong araw, isang di-inaasahang bisita ang dumating sa bahay ni Olga.

“A-Attorney Mike? Tapos na ang kaso ah, bakit nagpupunta ka pa rin?”

Tuwang-tuwa ang dalawang anak ni Olga na masayang sumalubong kay Mike. Iniabot ni Mike ang kaniyang pasalubong na isang kahon ng doughnuts na alam niyang paborito ng mga anak ni Olga.

“K-Kuwan, namiss ko lang ang mga bata… saka gusto ko ring malaman at kumustahin ang kalagayan mo,” nauutal na sabi ni Mike. Lintik, sa korte, wala siyang takot na sumagupa sa kaniyang mga kalaban, makipagtagisan ng mga salita at talino, ngunit bakit siya nabubulol at kinakabahan sa harapan ni Olga?

“Okay naman ako, Attorney Mike…”

“Mike na lang… please… saka… gusto rin kitang makita. Miss kita.”

Natigilan si Olga. Kinabahan si Mike nang titigan siya ng babae.

“N-Namiss din kita… Mike…”

Simula noon ay lagi nang bisita ni Olga si Mike, hindi bilang abogado at tagapagtanggol sa korte, kundi bilang bagong tagapagtanggol… panghabambuhay.