Nais ni Misis na Gumamit Sila ng Wikang Ingles Kapag Nag-aaway Silang Mag-asawa; Sagipin Nga Kaya ng Suhestiyong Ito ang Kanilang Pagsasama?

Galing eskwelahan si Elizabeth nang maabutang nag-aaway ang kaniyang mga magulang sa bagay na hindi naman talaga dapat pang pag-awayan.

Tuloy-tuloy lamang siyang naglakad papasok upang magtungo sa kaniyang silid nang agad ring matigilan sa nakita. Naroon na rin pala ang kaniyang Kuya Eric, Kuya Lance at Ate Bea. Maaga yatang nag-uwian ang mga ito mula sa trabaho o sadyang late lang siyang nakauwi ngayon dahil sa tinapos na school project.

“Ano na naman ba ang pinag-awayan nila?” tanong niya kay Kuya Eric, na ang tanging sagot ay kibit-balikat.

Kahit kailan talaga’y wala itong kwentang kausap! Paano kaya kung magkaroon ito nang nobya? Malamang ang lungkot nang buhay nila. Hindi nagsasalita ang kapatid niyang ito e.

“Ate, anong pinag-awayan nila?” nagbabakasali niyang tanong sa kapatid na babae, ngunit gaya ni Eric ay wala rin siyang nakuhang sagot rito, dahil kararating lang rin daw nito.

Susuko na sana siya at magpapatuloy na lang sa pagtungo sa silid nang magsalita si Kuya Lance.

“Nagluto si mama ng meryenda, kaso nasunog niya ito kaya nagalit si papa at ayon nahalungkay na ang mga nakaraan nilang away,” anito.

Kaya naman pala! Nilingon ni Elizabeth ang dalawang magulang na hanggang ngayon ay patuloy pa rin sa pagbabangayan at kung ano-ano na lamang ang mga pinagsasabi na animo’y mga batang paslit na hindi nagkasundo sa isang bagay.

“Alam mo, Lucio! Sawang-sawa na ako d’yan sa ugali mong iyan! Ang mabuti pa siguro talaga’y maghiwalay na lang tayo! Tutal sawang-sawang na ako sa’yo at malalaki na ang mga anak natin! Tiyak maiintindihan na nila tayo!” galit na litanya ni Mildred.

“Hah! Akala mo ba’y ikaw lang ang nagsasawa sa’kin? Ako rin! Sawang-sawa na akong intindihin ka, Mildred! Palagi ka na lang ganyan, hindi ka napagsasabihan kasi ganyan ka. Nagagalit ka kaagad at naghahalukay nang mga nakaraan. Nakakasawa na rin kaya ano!” galit ring tugon ni Lucio.

“Talaga! Maghiwalay na tayo!” Akmang mag-wa-walk-out na sana si Mildred sa harapan ng asawa nang muling magsalita si Lucio.

“Ang galing-galing mo kapag mga kasalanan ko ang inaalala mo! Pero hindi mo man lang maalala ang usapan natin na kapag nag-aaway tayo’y mag-usap tayo na gamit ang wikang ingles! Ano? Sige ngayon ka maglitanya sa’kin at ngayon ka makipaghiwalay,” nanghahamong wika ni Lucio.

Tila nanigas si Mildred sa kinatatayuan. “Kapal n—”

“English only please!” galit na putol ni Lucio sa asawa. “You insisted that first, remember? You said that if we’re having an argument we must speak in English. So now speak in English,” nanghahamon na wika ni Lucio.

Tila nalunok na ni Mildred ang kaniyang dila. Tama si Lucio, siya ang nagsabi noon na sa tuwing mag-aaway sila’y magbabangayan silang gamit ang ingles na salita. Pero paano siya mag-iingles kung puros galit ang naiisip niya ngayon.

Hindi naman mapigilan nina Bea, Eric, Lance at Elizabeth ang hindi mapangiti sa nagiging takbo ng usapan ng mga magulang. Saksi sila no’ng nagpangakuan ang dalawang mag-aaway gamit ang wikang ingles.

“Go ahead, Mildred, say those words again!” untag ni Lucio sa asawang animo’y Tigreng galit kani-kanina lang. Pero nang pagsasalitain niya ito ngayon ng wikang ingles ay animo’y tupang walang alam sa nangyayari sa mundo.

“W-we…” nauutal na sambit ni Mildred.

Sino ba namang sir@ulo ang makakapag-isip ng salitang ingles kung gigil na gigil na? Kakainis!

“W-we… n-need to— ahh!” Inis na singhal ni Mildred. “Never mind! Binabawi ko na ang mga sinabi ko kanina. Ayoko nang makipaghiwalay. Maliligo na ako,” aniya saka dire-diretsong naglakad paakyat sa itaas upang pahupain ang inis na nararamdaman.

Naisahan na naman s’ya nang kaniyang asawang si Lucio. Sa kabila nang inis ay natatawa na lamang siya sa nangyari.

Nang tuluyang mawala sa harapan si Mildred ay agad na humalakhak ng tawa si Lucio. May maganda ring pa lang naidudulot ang hamon noon ni Mildred sa kanya. Mabuti na lang at naisip niya iyon kaagad.

“Ang galing mo sa parteng iyon, pa,” natatawang sambit ni Bea.

“Ang pag-iingles lang pala ang makakatiklop kay mama e,” segunda naman ni Eric saka sabay-sabay na nagtawanan silang lahat.

Nang makabawi sa pagtawa ay muling nagsalita si Lucio. “Lesson learned mga anak. Kapag may mga asawa na kayo, hamunin niyo rin nang inglesan. Tingnan natin kung tatagal ba ang away niyo,” aniya saka muling humalakhak ng tawa.

Nakakatawa mang pakinggan ang naging away nina Lucio at Mildred, ang mahalaga’y nagawan nila iyon nang paraan upang hindi na lumaki pa ang away sa pagitan nila.