Pinagbintangan Niya ang Lalaking Marungis na Umubos ng Paborito Niyang Pagkain, Sa Huli’y Siya Pa ang Napahiya

Si Lena ay patungo sa Cebu kung saan ang lupang sinilangan niya. Habang naghihintay na tawagin ang kanyang flight ay tumambay muna siya sa lobby ng airport. Doon ay may nakita siyang marungis na lalaki. Tumabi ito sa kanya. Hindi niya naman ito pinansin at sa halip ay nagbasa na lamang ng libro. Habang napapasarap sa pagbabasa ay kumakain rin siya ng paborito niyang cookies. Pero laking gulat niya nang makitang kumuha rin doon ang lalaking marungis. Sa isip-isip niya’y siguro gutom ang lalaki. Kaya naman binigyan niya ito ng isang buo. Ngumiti ang lalaki at ginantihan niya iyon. Nasa kalagitnaan na siya ng binabasa niya nang makapang wala nang lamang cookies ang kinakain niya. Napaangat siya ng tingin sa lalaki.”Kinain niyang lahat?!” Sa halip na sabihan ay inirapan niya na lang ang gutom na lalaki. Hindi na siya naaawa dito. Sa halip ay naiinis na dahil inubos nito ang paborito niyang cookies. Matagal pa man din ang hihintayin niyang oras para sa flight. Inis siyang umalis sa upuan at nag-ikot ikot nalang. Lumipas ang oras at nakita niyang kasabay niya pa ang lalaki sa eroplanong sasakyan niya. “Aba at pinapapasok pa pala ang ganyang kadusing sa eroplano.” Nagulat siya nang katabi niya rin iyon sa upuan,”Kapag minamalas ka nga naman. Katabi ko pa ng upuan ang swapang sa cookies.” Nang papaandar na ang sinasakyan ay nagdesisyon siyang kunin ang mp3 niya upang makinig nalang sa music. Ngunit laking gulat niya nang makitang naroroon pa rin ang cookies niya. Walang bawas at nakabalot pa. “Paano nangyaring—” napatigil siya at naalalang hindi pa nga pala niya nilalabas ang cookies niya kanina. “So sa kanya ‘yung kinakain ko kanina pa?” Napalingon siya sa lalaki. Nakangiti ito sa kanya na tila narinig ang bulong niya. Hiyang-hiya siyang humingi ng tawad dito. Hindi pala ito ang swapang sa pagkain kundi siya! Disclaimer: Ang kwentong ito ay kathang-isip lamang. Ang mga nabanggit na pangalan, karakter, negosyo, lugar, pangyayari at mga insidente ay maaaring produkto lamang ng imahinasyon ng may-akda. Anumang pagkakapareho sa sinumang nabubuhay o pumanaw na tao o personalidad at aktwal na pangyayari ay nagkataon lamang. Ang Inday Trending ay isang website na ang layunin ay magbigay ng aral, inspirasyon at katuwaan sa mambabasang Pilipino sa pamamagitan ng pagpapalawig ng aming imahinasyon upang makagawa ng makabuluhang akda na tumatalakay sa pang-araw-araw nating buhay. Ang mga akdang ito ay orihinal na gawa ni Inday Trending at ng kanyang mga manunulat. sa ibaba. Para sa mas maraming updates, i-like lamang ang aming Facebook page.